Styrk symjeopplæringa
I dag er det store skilnadar mellom kommunar og skuler når det gjeld tilgang til basseng, reiseavstandar, økonomi og kompetanse. Mange elevar får for lite tid i vatn, og for mange går ut av grunnskulen utan tilstrekkelege symjeferdigheiter og tryggleik i vatn. Dette rammar særleg born som ikkje har mogleg til å lære å symje utanom skulen, anten det er mangel på fritidstilbod eller av økonomiske grunnar.
Ein føresetnad for god symjeopplæring er at lærarane har nok kompetanse og eit godt grunnlag for å lære vekk. Difor meiner Senterungdomen det er på tide å gje symjing ein større plass i utdanninga av kroppsøvingslærarar slik at vi sikrar kompetente lærarar som er trygge på kunnskapen dei skal lære vekk.
Senterungdomen meiner det er viktig å styrkje symjeopplæringa. Den må vere mogleg å gjennomføre i heile landet, og der avstandane er store og bassengkapasiteten avgrensa. Vi treng eit likare tilbod i heile landet som sikrar symjeferdigheit og tryggleik i vatn.
Senterungdomen vil:
-
Gje symjing større plass i utdanninga til kroppsøvingslærarar
-
Leggje til rette for jamleg kursing for kroppsøvingslærarar
-
Halde på kompetansekrava til symjeopplæringa
-
Øyremerke tilstrekkeleg med midlar til symjeopplæring samt kompensere for ekstra utgifter til reise, leige eller bemanning.
-
Innføre krav om tal på kor mange timar i kroppsøving som skal gå til symjeopplæring
-
Styrkje samarbeidet mellom skule og Redningsselskapet og RS Ung for å gje fleire elevar praktisk opplæring i livredning, sjøtryggleik og ferdsel i vatn