Nei til årleg EU-kontroll for bilar over 10 år
Forslaget vil føre til auka kostnader og meir administrativt arbeid for bileigarar som har valt å halde eldre køyretøy i drift. Samstundes vil det skape ytterlegare press på bilverkstadene, som i mange område allereie har utfordringar med kapasitet og ventetid. Ei slik endring kan svekkje insentiva for å ta vare på og vedlikehalde eldre bilar, og i staden fremje ei utvikling der bruk og kast blir normen.
Senterungdommen vil:
-
Seie klart nei til EU-kommisjonens forslag om årleg EU-kontroll for person- og varebilar over ti år.
-
Arbeide for at Noreg ikkje innfører dette kravet, sjølv om det skulle bli vedteke i EU.
-
Fremje bilpolitikk som støttar vedlikehald og gjenbruk framfor bruk og kast.
-
Sikre at tekniske kontrollordningar er tilpassa faktiske behov og ikkje påfører bileigarar unødvendige kostnader.